Владимир Путин: Монгол Улсын Ерөнхийлөгч өөрийн биеэр хүрэлцэн ирсэнд маш их баяртай байна
Тавдугаар сарын 7-нд ОХУ-ын Ерөнхийлөгч Владимир Путин, Монгол Улсын Ерөнхийлөгч Ухнаагийн Хүрэлсүх нарын уулзалт боллоо. Ерөнхийлөгч У.Хүрэлсүх Аугаа эх орны дайнд ялалт байгуулсны түүхт 80 жилийн ойн арга хэмжээнд оролцохоор Москва хотноо очоод байна
ОХУ-ын Ерөнхийлөгч Владимир Путин Монгол Улсын Ерөнхийлөгч болон дагалдан яваа төлөөлөгчдөд хандан "Аугаа эх орны дайнд ялалт байгуулсны түүхт 80 жилийн ойн баярын босгон дээр Москва хотод ирсэн та бүхэнтэй мэндчилье. Монгол Улсын Ерөнхийлөгч та энэхүү түүхэн ойн арга хэмжээнд өөрийн биеэр хүрэлцэн ирсэнд маш их баяртай байна" гэлээ
Тэрбээр мөн "Манай хоёр улс хамтын түүхэн баатарлаг үйлстэй. 2024 онд Халх голд Японы милитаристуудыг ялсан хамтын ялалтынхаа 85 жилийн ойг тэмдэглэсэн. Та бүхэнтэй хамт энэхүү түүхэн өдрийг миний Улаанбаатар хотод хийсэн айлчлалын үеэр хамтдаа тэмдэглэсэн
Аугаа эх орны дайны жилүүдэд болон 1945 онд Квантуны армийг ялахад Монгол Улстай хамтран ажилласныг Орост маш өндрөөр үнэлдэг. Энгийн ардын хөрөнгөөр боссон Улаан армийн танкийн цуваа болон "Монгол ард" нисэх онгоцны эскадрил манай улсын төлөө, бидний хамтын ялалтын төлөө байлдаж, 1945 оны наймдугаар сард Монголын ардын арми Японы цэргүүдийн эсрэг тулаанд оролцож байлаа. Бид энэ бүгдийг санан дурсаж, өндрөөр үнэлдэг
Хөрш, эв найрамдалт Монгол Улстай байгуулсан стратегийн хамтын ажиллагаа бол манай улсын бодлогын тэргүүлэх чиглэлийн нэг юм Улс төрийн яриа хэлэлцээ хөгжиж, Засгийн газрын тэргүүнүүд уулзаж, Гадаад харилцааны сайд нарын шугамаар хамтын ажиллагаа өргөжиж байна. Батлан хамгаалах, аюулгүй байдал, парламент хоорондын харилцаа холбоо бэхжиж байна, соёл, боловсролын салбарт хамтын ажиллагаа хөгжиж байна
Монгол Улс бол манай худалдааны чухал хамтрагч. Өнгөрсөн жил бараа эргэлт 17.5 хувиар өссөн. Энэ оны эхний хоёр сарын байдлаар 25 гаруй хувиар өссөн Бид та бүхнийг харахдаа маш их баяртай байна. Тавтай морилно уу! гэлээ
1 RUB = 42.7 MNT