Олон улсын тусгай олимпын бүсийн хурал Монгол Улсад болж байна
Монгол Улсад Олон улсын тусгай олимпын бүсийн хурал болж байна. Хуралд оролцохоор тус байгууллагын тэргүүн Мэри Дэвис болон бүсийн захирлууд ирсэн бөгөөд Ерөнхий сайд Г.Занданшатар тэднийг өчигдөр хүлээн авч уулзлаа.
Ерөнхий сайд тусгай олимпыг бүх талаар дэмжихээ илэрхийлж, боловсрол, спорт, нийгмийн хүртээмжийг нэмэгдүүлэх бодлого хэрэгжүүлнэ гэв. Тусгай олимп нь оюуны бэрхшээлтэй хүүхэд, залуусыг спортоор дамжуулан нийгэмшүүлэх зорилготой хүмүүнлэгийн хөдөлгөөн юм. Монгол Улс 2013 онд энэ хөдөлгөөнд нэгдсэн бөгөөд одоогоор 1000 гаруй тамирчинтай болсон.
Монголын тусгай олимпын хорооны тэргүүн С.Оюун тусгай сургуулийн хүүхдүүдэд тэмцээнд оролцох боломж бага байсныг дурдан, тусгай олимпын хүрээнд тэдний хөгжилд чухал дэм болсон гэж онцлов.
Мэри Дэвис Ерөнхий сайдад талархал илэрхийлж, тусгай олимпын үйл ажиллагаа 1968 онд АНУ-д эхэлсэн бөгөөд одоогоор 175 улс гишүүнээр нэгдээд байгааг тэмдэглэн хэллээ.
Photo gallery
1/1
—
