ОХУ, Беларусийн Ерөнхийлөгч нар Монгол Улсын Үндэсний их баяр Наадмын мэндчилгээ дэвшүүллээ

ОХУ, Беларусийн Ерөнхийлөгч нар Монгол Улсын Үндэсний их баяр Наадмын мэндчилгээ дэвшүүллээ

ОХУ-ын Ерөнхийлөгч Владимир Путин, Бүгд Найрамдах Беларусь Улсын Ерөнхийлөгч Александр Лукашенко нар Монгол Улсын Ерөнхийлөгч Ухнаагийн Хүрэлсүх-д Үндэсний их баяр Наадмыг тохиолдуулан баярын мэндчилгээ ирүүлжээ.

Владимир Путин мэндчилгээндээ ОХУ, Монгол Улс найрсаг, сайн хөршийн уламжлалт харилцаатайг онцолж, хоёр орны харилцан ашигтай хамтын ажиллагааг бүхий л салбарт өргөжүүлэн бэхжүүлэх нь ард түмний нийтлэг эрх ашигт нийцэхээс гадна бүс нутгийн тогтвортой байдал, аюулгүй байдалд чухал хувь нэмэр оруулна гэдгийг тэмдэглэсэн байна. Мөн Монгол Улсын Ерөнхийлөгчид эрүүл энх, ажил үйлсийн амжилт, Монголын ард түмэнд аз жаргал, хөгжил цэцэглэлтийг хүсэн ерөөжээ.

Харин Александр Лукашенко мэндчилгээндээ Наадам бол Монголын төрт ёсны түүхээс улбаатай, улс орны өвөрмөц соёл, ард түмний эрч хүчийг илэрхийлдэг онцгой баяр хэмээн онцолсон байна. Тэрээр Наадмын бахархал нь зөвхөн түүхийн номын хуудсанд бус, монгол бөхчүүдийн зориг, сурын харваачдын цэц мэргэн байдал, тал нутгаар давхих хурдан хүлгийн хийморьт оршдог хэмээгээд Монголын төр, ард түмэнд энх амгалан, хөгжил дэвшлийг хүсэн ерөөж, “Монголын мөнх хөх тэнгэр үргэлж цэлмэг байг” хэмээн мэндчилжээ.

Эх сурвалж: Монгол Улсын Ерөнхийлөгчийн Хэвлэл мэдээллийн алба