Н.Учрал: МАН авлигачдын хоргодох байр, халхлах хана хэрэм биш
Монгол Ардын нам (МАН)-ын Бага хурлын II хуралдаан болж, намын дарга Ням-Осорын Учрал “Эрх чөлөөний дөрвөн зам, дөрвөн чөлөөлөлт” сэдвээр улс төрийн илтгэл тавилаа.
Тэрбээр илтгэлийнхээ төгсгөлд намын зарим гишүүдийн гишүүнчлэлийг түдгэлзүүлэх, чөлөөлөх санал дэвшүүлснээ мэдэгдсэн юм.
Н.Учрал “Танилын нүүр халуун ч эх орон, иргэн бүрийн ирээдүй, эрх чөлөө илүү үнэ цэнтэй. Ардын нам авлигачдын хоргодох байр биш. Авлигын эсрэг шийдвэрээ хойшлуулах эрх бидэнд байхгүй” хэмээн онцолжээ.
Түүний мэдээлснээр, прокурорын байгууллагаас авлига, албан тушаалын хэрэгт яллагдагчаар татагдсан УИХ-ын гишүүн Дашзэгвийн Амарбаясгалан, Эрчим хүчний сайд асан Нансалын Тавинбэх, Үндсэн хууль зөрчсөн нь Монгол Улсын Үндсэн хуулийн Цэц-ийн дүгнэлтээр тогтоогдсон УИХ-ын гишүүн Хүрэлбаатарын Булгантуяа, мөн намын бодлого, үйл ажиллагаанд харш үйлдэл гаргасан гэх үндэслэлээр Бага хурлын гишүүн асан А.Амундра нарыг МАН-ын гишүүнээс чөлөөлөх нь зүйтэй гэж үзэж байгаагаа илэрхийлсэн байна.
Энэ нь намын зүгээс хариуцлага, ёс зүйн зарчмыг чангатгах шийдвэрийн нэг хэсэг гэж тэрбээр мэдэгдлээ.
1 RUB = 44.7 MNT
