А.С.Пушкины нэрэмжит Орос хэлний дээд сургууль болон Монгол Улсын Их Сургуулиас хамтран санаачилсан “Ирээдүйн эрдэмтэд” олон улсын төслийн оролцогчид, зохион байгуулагчдад зориулсан хүндэтгэлийн хүлээн авалт Монгол Улс дахь ОХУ-ын Элчин сайдын яаманд 2025 оны арваннэгдүгээр сарын 17-нд боллоо.
Уг арга хэмжээнд Пушкины нэрэмжит дээд сургуулийн захирал Н.В.Гусев, Оросын ШУА-ийн таван хүрээлэнг төлөөлсөн эрдэмтэд, Монголын Орос хэл, утга зохиолын багш нарын холбоо (МонАПРЯЛ)-ны ерөнхийлөгч Ц.Магсар, дэд ерөнхийлөгч С.Эрдэнэмаам, мөн төслийг хамтран зохион байгуулагч болох Монгол Улсын Их Сургуулийн төлөөлөгчид оролцов.
“Ирээдүйн эрдэмтэд” төсөл Монгол Улсад 2025 оны 11 р сарын 17-нд эхэлсэн. Төсөлд шинжлэх ухааны болон шинжлэх ухааныг түгээн дэлгэрүүлэх чиглэлийн найман өөр сэдвээр 32 лекц багтсан бөгөөд эдгээрийг Оросын найман эрдэмтэн Монголын их, дээд сургуулиудын оюутнуудад унших юм. Эрдэмтдийг МУИС-аас гадна тус улсын тэргүүлэх их сургуулиуд болох ШУТИС, СУИС, ХААИС, МУБИС, АШУҮИС хүлээн авч лекц уншуулна. Бүх лекцийг Зөвлөлт, Оросын их, дээд сургуулиудыг төгсөгч багш нарын дэмжлэгтэйгээр монгол хэл рүү орчуулж байна.
Төслийн хүрээнд оюутнуудад квант технологи, цахим ихэр хувилбарууд, тархи судлал, хүнгүй үйлдвэрлэл, автоматжуулалтын технологи, нөөц хэмнэх эрчим хүч, олон улсын технологийн өрсөлдөөн, музейн болон хэвлэлийн чиглэлээрх дэлхийн болон Оросын шинжлэх ухааны дэвшил, хамгийн сүүлийн үеийн судалгааны ололт амжилтуудыг танилцуулах юм.
“Ирээдүйн эрдэмтэд” төслийн Монгол дахь үе шат 2025 оны арваннэгдүгээр сарын 21-нд өндөрлөнө.
Photo gallery
1/3
—
