2026 оны долоодугаар сарын 22-ны өдрөөс Евразийн эдийн засгийн холбоо (ЕАЭЗ) болон Монгол Улсын хооронд байгуулсан түр худалдааны хэлэлцээр хүчин төгөлдөр болж, хэрэгжиж эхэллээ.
Уг хэлэлцээрийн хүрээнд нийт 367 төрлийн барааны гаалийн татварыг бүрэн тэглэх эсвэл бууруулахаар болсон бөгөөд энэ нь аж үйлдвэрийн болон хөдөө аж ахуйн олон төрлийн бүтээгдэхүүнийг хамарч байна. Евразийн эдийн засгийн комиссын Худалдааны сайд Андрей Слепневийн хэлснээр, хэлэлцээр хүчин төгөлдөр болохоос өмнөх хүлээлтийн үеэс бизнесийн идэвх эрс нэмэгдэж, 2026 оны эхний улиралд талуудын худалдааны эргэлт өмнөх оны мөн үеэс гуравны нэгээр өссөн байна.
Монгол Улсын хувьд ЕАЭЗ-ийн гишүүн орнуудаас импортлох барааны үнэ буурч, улмаар хэрэглээ болон худалдааны эргэлт нэмэгдэх боломж бүрдэх юм. Харин ОХУ-ын хувьд Монголын зах зээлд бараа бүтээгдэхүүнээ илүү таатай нөхцөлөөр нийлүүлэх боломж нээгдэж байна. Шинжээчдийн тооцоолсноор, ОХУ-аас Монгол руу экспортлох бүтээгдэхүүний 89 хувь нь гаалийн татвараас чөлөөлөгдөж, үүний үр дүнд Оросын бизнес жилд 8 тэрбум рубль хүртэлх зардал хэмнэх боломжтой аж.
Мөн энэхүү хэлэлцээр нь Монгол, ЕАЭЗ-ийн гишүүн орнуудын хоорондын аялал жуулчлал, соёлын хамтын ажиллагааг өргөжүүлэхэд эерэг нөлөө үзүүлэхээр байна.
Эх сурвалж: ТАСС
