Монгол Улсад Замын хөдөлгөөний аюулгүй байдлын Үндэсний зөвлөлийг сэргээн байгуулж, нэрт блогчин Б.Болд дэд даргаар нь ажиллана

Монгол Улсад Замын хөдөлгөөний аюулгүй байдлын Үндэсний зөвлөлийг сэргээн байгуулж, нэрт блогчин Б.Болд дэд даргаар нь ажиллана

Засгийн газрын хуралдаанаар Замын хөдөлгөөний аюулгүй байдлын орон тооны бус Үндэсний зөвлөлийн үйл ажиллагааг сэргээх шийдвэр гаргажээ. Тус зөвлөлийн дэд даргаар “Моод” төслийн продюсер, олон нийтийн идэвхтэн Б.Болд томилогдсон байна.

Тэрээр өмнө нь хүүхдийн замын хөдөлгөөний аюулгүй байдал болон Замын хөдөлгөөний дүрмийг сахин мөрдөхийг уриалсан олон нийтийн аяныг зохион байгуулж байсан юм.

Ерөнхий сайд Н.Учрал томилгоог танилцуулах үеэр сэтгэл түгшээсэн статистик мэдээлэл дурджээ. Сүүлийн таван жилийн хугацаанд зам тээврийн ослын улмаас 312 хүүхэд амиа алдаж, 3,861 хүүхэд гэмтэж бэртсэн байна. Өөрөөр хэлбэл, Монгол Улсад ойролцоогоор 10 цаг тутамд нэг хүүхэд зам тээврийн осолд өртөж байна гэсэн үг юм.

“Жил бүр аян зохион байгуулж, төсөв хөрөнгө зарцуулдаг ч үр дүн хангалтгүй байна. Тиймээс бид Үндэсний зөвлөлийн үйл ажиллагааг сэргээж, аюулгүй байдлын талаарх зөв ойлголтыг хүн бүрд хүргэж чадах хүнийг татан оролцуулж байна” хэмээн Ерөнхий сайд Н.Учрал хэлжээ.

Б.Болдыг томилсонтой холбоотойгоор зөвлөлийн гишүүдийн ажил цалинтай эсэх талаар олон нийтийн сүлжээнд асуулт гарсан байна. Засгийн газрын хэвлэлийн албанаас тайлбарлахдаа, тус зөвлөл нь орон тооны бус байгууллага бөгөөд гишүүд нь цалин хөлсгүй, олон нийтийн сайн дурын үндсэн дээр ажиллана гэдгийг мэдээлжээ.